وش يقولوا المخطوبين في التلفون؟؟؟؟

فراشة الدمام · #1 06-12-2005, 24- 15:23

احد توه خاطب جديد عاد الكل يعرف حركات المخطوبين تلاقيه قبل أذان المغرب رايح الحلاق ومسوي له تنظيف بشرة وحالق ومرتب اللحية ومتشيك والعطر ريحته ألف متر قدام

وما يخلى احد في البيت ما سأله أنا عدل شكلي في هالبدلة؟

لو ألبس ثوب أحسن .... ضج البيت كله لين ما أذن راح صلى وعلى طوووووووول طيران على بيت الخطيبة دق الجرس فتحوا له الباب ودخل سلم على العم والعمة وأخوانها الصغير قبل الكبير ( لأجل عين تكرم مدينة)

وما تجي الخطيبة إلا ينسى الدنيا ومن فيها عاد يلزق كأنه ضاربينه بمسمار في بيتهم لين يأذن الفجر طبعا ما يضل احد في البيت ما يمر عليهم ( يعني افهم يا أخي ترى الوقت تأخر بس الأخ شعاره طنش تعش تنتعش) طبعا طول الجلسة عمارات تطيح وصواريخ تنطلق (اثر الشلخ البطولات اللي عنه ما تخلص الاخ ابو زيد الهلالي)

المهم ما يمديه يطلع من بيت ذيك الخطيبة دقيقة ويمكن اقل من دقيقة الا تلفون بيتهم يرن ترفعه أختها الصغيرة ( يا حبذا تكون فيها لقافة مو طبيعية ) هاه ؟؟؟؟؟ لا تقول وصلت بيتكم ؟ توك طالع قدامي

يرد عليها : لا ما وصلت أنا مو قايل لش خلي اللقافة عنش ؟ متى بتهوني ؟ لو تبغيني اعلقش في السقف بدل الثرية ؟ روحي نادي مرتي يا لله

تروح الفقيرة بعد التهزيء وهي تتحلطم تعالي خطيبش يبغاش ؟ طبعا زي الطرمان تجي ركييييييييض ويمكن تضرب ليها كم حركة تفحيط في الصالة لين توصل للتلفون : هلا حبيبي

هلا عمري هلا عيوني ............ الخ

طمني وصلت البيت ( سوبر مان الأخ )

لا حبيبتي أنا في السيارة بس قلت اسولف وياش لين أوصل

اها أني بعد ما ودي أفارقك دقيقة .....( احم احم تشفير )

المهم وصل الخ بيتهم وتوه داخل وهو بعده يكلم الا ينقطع الخط ويركض زي الصاروخ على غرفته طبعا بعد ما يطيح له كم طيحة على الدرج ويمكن يشوفه اخوه يمسكة غصب بيسولف وياه

المسكين منحرج

(بغى يصرف أخوه بس مو عارف ) جت في باله فكرة انه يتثاوب ونعسان ومافيه شدة يتكلم ولا كلمة والكلمة تطلع منه بطلعة الروح

اكيد اخوه بيخليه وما يمديه يخليه الاهو ركضة على التلفون

توه موصل ويدق عليها مرة ثانية

سوري عمري انقطع الخط ويش نسوي ويا ها لشبكة التعبانه

لالا عادي حبيبي أهم شي انك الحين تكلمني

ويعد يسولف ما خلى فلان ولا علان من أصحابه الا سولف عنه و أخر شي حبيبتي اسمعي انا بحط سبيكر وانتي سولفي انا بروح اسبح ( حركة هبلة )

ويقعدوا هذرة وسوالف على داك التلفون وهو كل شوي ها ارفعي صوتش ما اسمع ومن تخريف الاخ تطيح الصابونه من يده

وش فيك ( تسأله)

أدور الصابونه طاحت

طيب جيب لك وحدة ثانية

وتوه يتحرك الا يدوس على الصابون ويزلق ويطيح( مسكين يعور الفاد)

ها وينك حبيبي ويش هالصوت

لا عادي بس زلقت بالصابونة عادي حبيبتي

زين صار فيك شي

لالا جت سليمة ما فيني شي

المهم روحي ارتاحي الحين وأنا اشو فش بكرة في الليل

مع السلامة

زين حبيبي مع السلامة

ما مداها بنت الناس سكرت السماعة الا صوت مدوي ينفجر آآآآآآآآآآآآآآآآآآآآه ألحقوني ما خلى لا عمار ولا حسين ولا يوسف ما ناداهم نادوا أبوكم بعد خليه يشيلني آآآآآه انا طايح متكسر

يشيلوه أبوه واخو انه ويودوه المستشفى

الطبيب يقول له أن عنده كسر وشوية رضوض ولازم يترقد في المستشفى

ها اترقد لالالالالالا

شوف انا أوعدك يا دكتور بجيك كل يوم بس مو تقول لي ترقيد

الطبيب مصر على رأيه

يابن الناس هذي رجولي لو رجولك خلك ما عليك منه رجولي وانا حر انت مو مصدق جيب سكين الحين اقطعها

طبعا الطبيب بعد فصل الخبال اللي شافه طلعه على مسؤليته بعد ما وعده ابو الولد انه يجي يتابع حالته بانتظام وما يتحرك واجد عشان لا يضطر لعملية

هو طلع من المستشفى ثمان الصبح على طووووووول اتصل بالخطيبة يبشرها انا جاي في الطريق( كل يوم يروح جديدة يعني الحركة)

لالا حبيبي لا تتعب نفسك أنت مريض أني اللي بجي بيتكم اتطمن عليك

لا عمري أنتين اللي لا تعبي حالش انا باجي ( تمساح يدري ان اهلها ما بيخلوها تتأخر برى بس هو بيقدر يلزق في بيتهم تسع الاف ساعة )

المهم وراح بيتهم وسلم عليهم كلهم كالمعتاد لين ما جت حبيبة القلب وبس شافته قامت الدموع تصب

يابنت الناس لا تصيحي ترى مافيني شي شوفيني كيف الحين اركض

ويتحمل الالم ويسوي روحه فارس بني عبس ويركض قدامها بس عشان تسكت

بيسوي روحه بيروح بيتهم الا اذن الظهر ويمسكه ابوها وين ياولدي الحين وقت اذان وغذا وتطلع خلاص تغدا ويانا

لالالالالا يا عمي اهلي الحين بيحاتوني ( ما عليكم في قلبه بيموت من الفرحة)

اتصل ليهم وخبرهم انك بتتغدا عندنا

لو ما حلفت يا عمي( بدا الجدب الرجال لا حلف ولا شي)

ويقعد ويتغدا ويسولف ويسوي روحه بيروح الا اذن المغرب قال لا كيف اطلع باصلي لا تفوتني الفضيلة (طلع فيها اية الله العظمى)

وبما انه جت الليل وصار موعدهم رابط الاخ في بيت الخطيبة لين الفجر ودعها خلاص حبيبتي بكرة انا عندي موعد في المستشفى اذا خلصت بمر عليش

خلاص عمري اوكيه

وطبعا كالمعتاد اتصل في الخطيبة وكملوا سوالف لين وصل البيت

يوم ثاني في المستشفى وبما انه طلع فيها عنتر وقام يركض قال له الدكتور لازم عملية

سوى الاخ كل انواع الاحتجاج واقترح على الطبيب اقتراحين كل واحد اغبى من الثاني

الاول انهم يجيبوا خطيبته تترقد معاه في نفس المستشفى(مالك امل) حتى لو مرافقة لأي مريضة في قسم النساء ( قامت الخدمات الانسانية )

الطلب الثاني انهم يطلعوه بعد العملية على طول وتصير غرفة العناية في بيت الخطيبة( قوية ها )

المهم الطبيب اقنعه انهم بيجيبوا له خطيبته بعد العملية وسكت الاخ

هم سوا له العملية وخلوه مبنج كم يوم بس عشان يفتكوا منه .

مع تحياتي
فراشة الدمام