 |
|
 |
| ||
| ||
|
|
|
|||||||
| التسجيل | التعليمـــات | البحث | مشاركات اليوم | اجعل كافة المشاركات مقروءة |
| القصص و الروايات ما يبدعه قلمك من القصص والروايات |
 |
|
|
LinkBack | أدوات الموضوع |
|
#1
19-12-2007, 24- 11:21
|
||||
|
||||
فهده
فهده : بنت حلوه شعرها بني لين تحت كتفها بشوي وعيونها عسليه وكبار عمرها 18سنه رايحه ثالث ثانوي ادبي ابو محمد (سالم) : رجل اعمال ناجح عمره 60 سنه ام محمد (نوره) : ربه منزل حليله وطيبه عندها ولدين محمد الي عمره 7 سنين و عبدالله الي عمره 5 سنين عائله ابو متعب ابو متعب : اخو ابو محمد وهو برضوا رجل اعمال ام متعب : ربه منزل متعب : شاب عمره 27 سنه يشتغل مع ابوه نواف : شاب داااج وعمره 22 ويدرس بل الجامعه ريما : بنت عمرها 20نه وهي تدرس بل الجامعه سارا : بنت عمرها 18سنه رايحه ثالث ثانوي ادبي عائله ابو فيصل ابو فيصل :اخو ابو محمد تاجر معروف وناجح ام فيصل : ربه منزل فيصل : صديق نواف مرره وداااج مثله يحب القعده مع بنات عمه وعمره 22 سنه ويدرس بل الجامعه ريم : بنت عمرها 19 سنه رايحه للجامعه نوف : بنت عمرها 18 رايحه للثالث ثانوي ادبي صديقه سارا مرره الروح بل الروح عائله ابو تركي ابو تركي : رجل اعمال ام تركي : ربه منزل تركي : رجل هادي الطباع وعمره 30 ومتزوج وحده اسمها لمياء وعنده منها ولد عمره 3 سنين هيفاء : بنت عمرها 23 لسا بل الجامعه غاده : بنت عمرها 19 سنه رايحه للجامعه العنود : بنت عمرها 17 سنه رايحه لثاني ثانوي علمي وفيه كمان شخصيات بتتعرفون عليها مع القصه البدايه ربطت حزام الامان استعدادا لهبوط الطياره الا الان انا مو مصدقه اني بعيش بل الرياض مو مصدقه اني بترك كل احبابي وصديقاتي بجده بترك البيت الي عشت فيه مع امي ... امي الي توفت من قريب وتركتني لوحدي بهل الدنيا صحيح ان ابوي موجود بس من ابوي وامي تطلقوا ماشفت ابوي بعد كذا سمعت انه راح للرياض وتزوج وحده ثانيه وماصار يسال علي ولايدري وش اخباري ... قطع سلسله افكارها صوت الطيار معلنا وصلهم للرياض قامت فهده من مقعدها وطلعت مع الركاب من الطياره مشت فهده تناظر يمين يسار تدور ابوها لين لمحته من بعيد قالت في نفسها " هذا هو ابوي " مشت فهده ابتجاه ابوها طبعا ابوها ماكان يعرف ملامحها كيف صارت لانه لما طلق امها كان عمر فهده 6 سنوات فهده كانت حاسه بارتباك ماتدري تروح ولا ترجع " اااه بس ياليت ارجع ياليت " ابوها لاحظ من ارتباك البنت الي قدامه انها ممكن تكون فهده فقرر الابو يتاكد الابو : فهده ؟ فهده رفعت فهده عيونها للابو فهده : ايه انا فهده الابو : الحمد الله عل السلامه يا بنتي كيف كانت الرحله فهده في نفسها : بنتي ؟! وينك عني كل هل السنين الحين صرت بنتك ؟ فهده الله يسلمك , الرحله كانت عاديه صار فيه سكوت بينهم الابو : عظم الله اجرك يا فهده فهده : اجرنا واجرك الابو : يلا تعالي نروح البيت فهده : طيب والشناط ؟ الابو : ولد عمك فيصل بيجيبها بعد شوي فهده : اهااا اوكي طريق الروحه للبيت كان هادي لا ابو محمد ولا فهده كانوا يدرون وش يقولون فهده حست بصداع في راسها كل الاحداث صارت ورا بعض وفاه امها بل الحادث , العزا . عيشها في الرياض . وصلوا البيت ونزلت فهده من السياره وقفت تطالع البيت , البيت كان كبير وحلو ابو محمد : عجبك البيت ؟ فهده : ايه حلو ابو محمد : هذا بيتك يا بنتي واي شي تبينه بس عطيني خبر فهده : شكرا بابا ما قصرت ابو محمد : يلا يا بنتي تعالي ندخل تلقين ام محمد تنتظرنا فهده : اوكي فهده كان في راسها مليون سؤال كيف راح تكون العيشه هنا ؟! كيف راح تكون خالتي ام محمد ؟! حليوه ولا شرانيه ؟! بتكرهني ولا بتحبني ؟! فتح ابوها الباب الامامي ودخل ابو محمد : تفضلي البيت بيتك فهده: شكرا بابا ابو محمد : ام محمد ! يا ام محمد تعالي هنا صوت ام محمد من بعيد : جايه جايه ابو محمد : تعالي يا بنتي للصاله نريح فهده : اوكي بابا راحوا للصاله وقعدوا شوي وبعدين جتهم ام محمد ام محمد : ياهلا ومرحبا بفهده شلونك يا فهده ؟ وشخبارك ؟ فهده : الحمد الله طيبه ام محمد : كيف كانت الرحله ؟ فهده : كويسه ام محمد : عظم الله اجرك يا فهده والله ظاق صدري يوم سمعت الخبر فهده منزله راسها : عظم الله اجرك خالتي ام محمد ابو محمد يبي يلطف الجو : تعالي يا فهده اوريك غرفتك الجديده ام محمد : ايه سوينا لك غرفه خاصه لك فيها تلفزيون وتلفون وحمام كل الي تبينه موجود فهده با بتسامه : شكرا خالتي ما قصرتي ابو محمد: يلا يا بنتي تعالي فهده : ان شاء الله بابا راحت فهده مع ابوها وخالتها لغرفتها الجديده الغرفه اعجبت فهده كانت الغرفه كبيره و الجدران مطلينه بلون البينك الي تحبه فهده وحمام خاص وغرفه صغيره للملابس ابو محمد : هاه عسا عجبتك الغرفه ؟ فهده : ايه يا بابا مرره حلوه الغرفه ما قصرت ابو محمد : يلا يا بنتي اخليك تنامين الحين تاخر الوقت فهده : اوكي بابا وشكرا مره ثانيه عل الغرفه ابو محمد : العفو فهده : بابا ؟ ابو محمد : نعم يا بنتي فهده : وين اخواني ؟ ابو محمد : هم نايمين الحين بكره بتشوفينهم ان شاء الله فهده : اوكي ابو محمد : يلا تصبحين على خير فهده : وانتا من اهله ...فهده... طالعت خزانه الملابس كنت بارتب ملابسي بس تذكرت ان الشنط لسا ماوصلت انسدحت على سريري وقعدت اناظر السقف افكر بحياتي الجديده كيف بتكون ؟! كيف بتصير ؟! حلوة ولا تعيسه ؟! مثل حياتي بجده ؟! ولا اسوء ؟! اااه يا ماما ياليتك جنبي الحين تخففين المي وخوفي نزلت دموعي على ذكرى امي قعدت ابكي على سريري لحد ما نمت بسابع نومه ... البارت الثاني صحت فهده على صوت الجوال وكانت المتصله صديقتها فهده : الو ....: يعني لا هلا ولامرحبا بس الو ناشفه كذا فهده : اخلصي مها ليش مقومتني من صباح الله خير مها : ايييي صباح الله خير الساعه 12 الظهر الحين فهده : امااااانه مها : والله بكذب عليك يعني فهده : تلقين شنطي وصلت الحين مها : كيف الرياض ؟ فهده : حلوة مها : كيف مرت ابوك معاك ؟! ترا ان طلعت شرانيه اجيلها من جده واوريها الويل فهده : ههههههههههههههههه لا اول ماشفتها كانت حليله سلمت علي وورتني غرفتي الجديده بس الايام جايه ونشوف مها : كيف الغرفه ؟ فهده : هههههههههههههههه وانتي كل شي تبين تحققين فيه ؟ مها : وش اسوي لازم اطمن عليك واعرف اخبارك فهده : تطمنين ولا لقافه مها : تقدرين تقولين الاثنين هههههههههههههه فهده : هههههههههههههههههه فهده : مها مها : هلا فهده : انا خايفه مها : خايفه من ايش يا حبيبتي ؟ فهده : العيشه الجديده واعمامي وعيالهم مها : خوفك من العيشه الجديده شي طبيعي بس انا مو فاهمه خوفك من اعمامك وعيالهم هم اهلك مارح ياكلوكي فهده: مدري اخاف ما يتقبلوني او شي مها : لاااااا لاتخافي مين مايقدر يتقبلك انتي فهده الي كل البنات تتمنى تكون مثلك وفي نفس شخصيتك فهده : شكرا مها امووووووواه مها : ولووووو فهده : يالله انا مررره جوعانه الحين ما اكلت شي من امس مها : اوكي يا حبيبتي اكلمك بكره ان شاء الله فهده : اوكي مهاوي بااااي مها : باي سكرت فهده الخط وقعدت تناظر في ملابسها " يا الله انا نمت وما حسيت بنفسي" فصخت العبايه الي كانت عليها من امس وراحت تنزل تحت عشان تشوف شنطها وصلت ولا لا وهي نازله من الدرج سمعت صوت رجال استغربت فهده " مين هذا ؟! محمد ؟ لا ما اتوقع محمد صغير هذا صوت رجال طيب انزل واشوف مين " نزلت فهده للدور التحت وشافت شنطها عند الباب "اخيرا " ابو محمد : فهده فهده لفت ابوها وشافت جنبه رجال غريب فهده : نعم بابا ابو محمد : هذا ولد عمك فيصل فهده : هلا فيصل فيصل بمغازلجيه : هلاا فيييك فهده ناظرته با ستغراب قدام ابوي وتتمغزل الله يعينك على نفسك بس ابو محمد بحزم : فيصل فيصل نزل راسه وفهده قامت تضحك على غباءه ابو محمد : بخلي الخدامات يرقون الشنط لغرفتك فهده : اوكي فيصل : انا استاذن عمي ابو محمد : وين ؟ فيصل : مواعد اصدقاي ابو محمد : طيب فمان الله يا ولدي فيصل : فمان الله لف فيصل عل فهده : مع السلامه فهده فهده : باي فيصل : انتبهي عل نفسك ابو محمد معصب : ماكنك مصختهاا فيصل : اسف عمي يلا مع السلامه فهده و ابوم محمد : مع السلامه لما طلع فيصل ضحك ابو محمد فهده : هو دايم كذا مع بنات عمي ابو محمد : ايييه دايم كذا معهم الله يصلحه فهده : ههههههههههههههههه ابو محمد : ههههههههههههههههههههههه 
|
|
#2
19-12-2007, 24- 11:24
|
||||
|
||||
|
ريم ونوف كانوا قاعدين بل الصاله يناظرون تلفزيون دخلت عليهم ام فيصل ام فيصل : مارجع اخوكم ؟؟ ريم ونوف : لاااا ام فيصل : الله يهديه وش فيه تاخر نوف : يمه ليش فيصل يروح يجيب شنط الست فهده سواق عند ابوها اخوي ؟ ام فيصل : هاو وش ذا الحكي يا بنتي فهده بنت عمك وبعدين اخوك موافق وش حارك انتي نوف : الي حارني انها ما عمرها زارتنا ولا سالت علينا ولما عمتنا تشرف عندنا تخلي اخوي يجيب شنطها كانه سواق عندها ام فيصل : لاحول ولا قوه الا بل الله انتي ما تعرفين وش الي داخلها يمكن كانت تبي تعرفكم بس الظروف ما اسمحت لها ابوها الله يهديه ما سال عنها تبينها تسال عنه ؟ ريم : يما ما عليك من نوف هي تمشي ورا سارا كانها خاتم باصبعها وتردد كلامها لما كانت نوف بترد على ريم سمعوا الباب يتسكر بقوه وطبعا الي مسكره بقوه فيصل ام فيصل : فييييصل وجع يوجعك ما تعرف تسكر الباب بشويش لازم تفززع الحاره ؟!! فيصل : اسف يمه وحقك على رااسي من فوق ام فيصل : هاه وش صار معك وصلت الشناط لبيت ابو محمد فيصل : ايه يمه ام فيصل : طيب شفت فهده فيصل : ايييييه يمه شفتها ريم : حلوة ؟ فيصل : اييه والله حلوة نوف : اكيد مو احلى مني ومن سارا فيصل : مالت عليك انتي وسارا من زينكم يعني شايفين انفسكم ملكات جمال وععع عليكم ريم : ما قلت لك خاتم بايد سارا نوف : انطمي انتي ولا كلمه ريم : احترمي نفسك انا اكبر منك نوف : افففف طفشت منكم وراحت نوف فوق لعرفتها فيصل: اوووف فكه من وجهها التعيس ريم : هههههههههههه حلوه تعيس فيصل : ايه والله تعيس كل ما اشوفها يضيق خلقي ولا وتقول هي احلى من فهده ههه تخسي ريم : هههههههههههههه الله يرجك في بيت ابو محمد فهده كانت طالعه من الحمام (وانتو بكرامه) والفوطه كانت على راسها فهده في نفسها " يا حلو النظافه " راحت فهده لغرفه الملابس وطلعت لها جينز وتوب برتقالي ونزلت تحت عشان تتغدا مع ابوهاا وخالتها واخوانها دخلت غرفه الطعام وكان ابوها قاعده على راس الطاوله دخلت خالتها ومعها والولدين ام محمد : فهده هذول اخوانك محمد وعبدالله فهده : اهلين حبايبي ام محمد : محمد وعبدالله هاذي اختكم الكبيره فهده احترموها واسمعوا كلامها فاهمين ؟! محمد وعبدالله : فاهمين ام محمد:يلا غسلوا يدينكم وتعالوا تغدوا مر الغداء بهدوء خلصت فهده غداها وقامت فهده : الحمد الله شبعت ام محمد : وين ما كلتي الا شوي فهده : لا خلاص شبعت في بيت ابو محمد الساعه 9 بل الليل راحت فهده لغرفتها وفتحت التلفزيون قعدت تناظر فلم اجنبي لين سمعت احد يطق الباب فهده : تفضل ابو محمد : وشلونها بنتي ؟ فهده بابتسامه : تماام ابو محمد : فيه شي ابي اقوله لك فهده : تفضل قول ابو محمد: بكره عمك ابو فيصل مسوي عزيمه عشانك فهده باستغراب : انا ؟! ابو محمد: ايه يا بنتي فهده : ليش ؟ ابو محمد : ممكن تقولين عزيمه ترحيب فهده : اهاا ابو محمد : يلا يا بنتي انا بس حبيت اعلمك بل العزيمه فهده : اوكي بابا ابو محمد : يلا تصبحين على خير فهده : وانت من اهله طلع ابوها من الغرفه واقعدت فهده تفكر بل العزيمه الي بتصير عند ابو فيصل " ابو فيصل لحظه هذا فيصل ولده الي جانا اليوم هههههههههههههههه ذا الخبل" حست فهده بتعب وقررت انها تنام انسدحت فهده عل السرير وماحست بنفسها الا وهي بسابع نومه البارت الثالث قامت فهده على صوت المنبه ناظرت الساعه لقتها 11 قامت من السرير وراحت الحمام ( وانتوا بكرامه) تغسل وجهها وغيرت بيجامتها ولبست برمودا جينز وتوب ابيض ورفعت شعرها ذيل حصان ونزلت تحت للصاله لقت ابوها وخالتها قاعدين فهده : صباح الخير ابومحمد وام محمد : صباح النور راحت فهده وباست راس ابوها وقعدت جنبه ابو محمد : الله يرضى عليك يا بنتي فهده ابتسمت لابوها ام محمد : زين انك قمتي الحين الفطور بيجهز بعد شوي فهده : اوكي بيت ابو تركي البنات كانوا بغرفتهم يسولفون العنود : تتوقعون بتجي بنت عمي محمد اليوم ؟ غاده : اكيد مو العزيمه على شرفها ليش ماتجي العنود : ما ادري يمكن ماتجي هيفاء : لا ان شاء الله بتجي العنود : تتوقعون بتطلع حليله ولا زي سارا ونوف ؟ هيفاء : والله ما ادري ان شفناها يصير خير العنود : طيب وش بتلبسون ؟ غاده : يووووووه يل العنود وش فيك صايره مزعجه اليوم العنود : هذا جزاتي ابي اسولف معكم واونسكم مالت عليكم اروح اسولف لامي اصرف طلعت العنود من الغرفه وهي معصبه غاده : الله يعينها امي غاده وهيفاء : هههههههههههههههههههههههههههههههه بيت ابو متعب سارا كانت تكلم نوف بل التليفون نوف : بتجين العزيمه اليوم سارا : هههههههه اكيد وانا بفوت فرصه اشوف ست الحسن والجمال الي كلن يتكلم عنها نوف : فيصل يقول انها حلووة مرره سارا : ماعليك منه دايم ذوق العيال شين بل البنات نوف : مدري والله سارا : المهم نوف : امممم سارا : وصلتي الرساله الي عطيتك ايااها نوف : ايه ايه وصلتها سارا : كويس نوف : انا مو فاهمه انتي عندك رقمه ليس ماترسلين له بالجوال ؟! سارا : مالك دخل نوف : اوكي سارا : يلا انا بروح اخذ شاور نوف : اوكي يلا باي سارا : يلا باي بيت ابو محمد الساعه 7 ليلا فهده كانت واقفه عند دولاب الملابس تفكر وش تلبس "امممم اللبس الاورانج ولا الااحمر , تنوره ولابنطلون , افففففف يا ربي ليش انا كذا متوتره هم اهلي ليش انا خايفه افف " طاحت عيون فهده على بيجاما تمنت انها تلبسها وتنام وماتروح العزيمه بس طبعا ماتقدر لان العزيمه على شرفها " امممم خلاص لقيتها " طلعت فهده من الدولاب بلوزه طويله سودا فيها رسومات بل الابيض وبرمودا جينز لبست فهده ملابسها وفكت شعرها وحطت باف وحطت اكسسوارات اسود وابيض وبل المايك اب اكتفت فهده بل الكحل وقلوس احمر صوت ابو محمد من بعيد : يلا يا بنتي تاخرنا الساعه صارت 8 ونص فهده : طيب بابا الحين جايه حطت فهد عطر ولبست عبايتها ونزلت عند ابوها تحت ابو محمد : خلصتي فهده : ايه يا بابا خلصت راحوا كلهم لبيت ابو فيصل ولما دخلوا راح ابو محمد ممجلس الرجال وفهده وخالتها استقبلتهم ام فيصل ام فيصل : هلا هلا ومرحبا بفهده فهده وهي مرتبكه : هلا هلا خالتي ام فيصل : وشلونك وش اخبارك وراه ماتسالين عنا يا كافي هاذي اول مره نشوفك .؟ فهده: الظروف ام فيصل : يلا ماعليه شفناك الحين يلا تعالي اتفضلي كلهم هناك ينتظرونك فجاءه حست فهده برعشه قويه : كـ كلهم هـ هناك ام فيصل : ايه يحترونك من زمان فهده : اممم خالتي وين الحمام ام محمد : هذا وقته فهده : مضطره ام فيصل:ماعليه يا بنتي شوفي الحمام هنا فهده : شكرا راحت فهده عند المغاسل وهي ترتجف:ياربي انا ليش خايفه كذا مايسوى كل هل الخوف تراهم اهلي و ياربي انا وش جابني هنا ... : تسولفين مع نفسك ؟! لفت فهده على الي تكلم معها فهده باستغراب : فيصل ؟! فيصل : بشحمه ولحمه ههههه فهده قامت تطالعه من فوق لتحت : طيب انا بروح اسلم الحين وخر عن طريقي فيصل متكي عل الجدار : يا قووويه فهده : افف بزر ودفته عن طريقها وجت بتدخل ولا رعشه الخوف رجعت لها من جديد وتصلبت في مكانها " ياربي انا ليه كذا" لاحظ فيصل خوفها وضحك : تعالي تعالي ادخلك انا ان قعدتي على هل الحال مارح تدخلين ابد جا فيصل ومسك يد فهده وسحبها معاه للصاله فهده كانت مصدومه من فيصل " خيييييير وش يبي هذا مدخلني عليهم بهل الشكل وش يقولون عني اول مره يشوفني ماسكه يد ولد عمها وداخله وكانه شي عادي انا قايله البس ذيك البيجاما واقعد بل البيت بس لقافتي خلتني اطلع , حسبي الله عليك يا فيصل هذا موقف تحطني فيه " الكلام فجاءه وقف وكل الانظار صارت على فيصل وفهده فهده شالت يدها من فيصل بقوه وتوهقت فهده " وش اسوي الحين ؟ اسلم ولا وشو ؟ " فهده : ال السلام عليكم ام فيصل حست بخوف هده فقررت تسهل الموقف : وعليكم السلام يا بنتي تعال تعالي سلمي على زوجات عمانك وبنات عمك فهده حست براحه " الله يفرج عليها مثل مافرجت علي " راحت فهده وسلمت على زوجات اعمامها وبنات اعمامها واول وحده من بنات عماتها كانت سارا فهده : اهلين سارا بدون نفس : هلا والله فهده رفعت حاجب كان ودها ترد عليها بس ما حبت تسوي مشكله يكفي الاحراج الي سببه لها فيصل الي جنب سارا كانت نوف سلمت عليها فهده وبرضوا كان سلامها بدون نفس " وش فيهم ذول قاتله لهم قتيل وش هل المعامله " وكان جنب نوف ريم فهده : اهلين ريم : هلا والله كيفك فهده ؟ فهده بابتسامه : والله الحمدالله تمام انتي ؟ ريم : تمام ريم قربت من اذن فهده وقالت لها : ماعليك من سارا ونوف فيهم نقص فهده : ههههههه سلمت فهده على كل بنات عماتها وقعدت وقعدت جنب ريم ريم : اما الموقف الي صار لك تو تووحفه لو تشوفين وجهك كيف صار فهده : يالله طاااح وجهي تمنيت الارض تنشق وتبلعني ريم : لا عادي هو اصلا دايم كذا فهده : الله يعينه على نفسه ريم : هههههههههه من جد من بعيد كانت سارا ونوف يناظرون فهده باحتقار نوف: شفتي كيف دخلت علينا وماسكه يد فيصل صدق ماتستحي سارا: وهي تعرف الحيا اصا لو انها تستحي كان سالت علينا قطت غاده معهم بل السالفه : يعني انتي الي تعرفين الحيا ؟ سارا : ايه احسن من هل الفهده الي طايرين لي فيها غاده : طيب ما دامك انتي تعرفين الحيا والاصول كان سالتي عنها سارا : وش دخلك انتي بل السالفه اصلا انقلعي عن وجههي ام فيصل : يلا تفضلوا العشا قاموا الحريم وراحوا صاله الطعام تعشت فهده وخلصت وراحت تغسل يدها في المغاسل .. : غريبه ما سولفتي مع نفسك هل المره فهده عرفت الصوت ولفت : هاهاهاها سخيفه زي وجهك فيصل : وش فيك معصبه؟! فهده : وش فيني معصبه ؟ لا ابد مو معصبه ولا شي ! مو معصبه عل الاحراج الي سببته لي قدام زوجات عماتي وبناتهم الي اول مره اشوفهم ! فيصل : ههههههههههههههههههههههههههههههههههههههههههههه ههههه ههههههههههههههههههههههههههههههههههههههههههههه ههه فهده : تضحك انت وجههك فيصل : لاني تذكرت وجهك ههههههههههههههههههههههههههه توووحفه ههههههه فهده : اففف طلعت فهده من المغاسل وهي واصله معها من فيصل " انسان غير طبيعي" فيصل : وعلى فكره فهده : خير فيصل : ابوك يبيك تسلمين على عمانك لانك ما جيتي سلمتي عليهم فهده : اييه صح طيب جت بتروح فهده وماعرفت وين مجلس الرجال فيصل : طييب اوديك انا تعالي ومشت فهده ورا فيصل لين ما وصلوا مجلس الرجال دخلت عليهم فهده وسلمت على عمانها وقالها ابوها تلبس عبايتها لانهم بيروجون البيت راحت فهده لبست عبايتها وجتها ريم ريم : فهده انتظري ابي اخذ رقم جوالك فهده : اوكي هذا رقمي 0505 ...... ريم : اوكي يلا باي يا قمر لاتقطعين فهده : اوكي باي رجعت فهده للبيت وراحت لغرفتها وغيرت ملابسها ولبست بيجاما وانسدحت على السرير ونامت -------------------------------------------------------------------------------- السمووووووحه منكم أنا قريتالقصه وعجبتني وحبيت أنقلها لكم أنشاء الله تعجبكم واشوف ردووودكم تنور صفحتي أختكم no000r
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
|
|
المواضيع المتشابهه للموضوع: فهده
|
||||
| الموضوع | كاتب الموضوع | المنتدى | مشاركات | آخر مشاركة |
| الي شاطـــــــــــــــــــــر يدخل ويوريني شطااااااااااارته... | فراشه المنتدى | همس القوافي | 2 | 27-10-2007 24- 01:26 |
| صور الخادمه التي عذبت على ايدي الممثله المجرمه وفاء مكي | سوزانا تميم | نجوم الفن و المشاهير و أغاني و طرب | 22 | 05-06-2007 24- 01:43 |
| قصتي مع حبي الاول | طريح الهوى | الحوار العام | 6 | 19-05-2007 24- 22:41 |
| خطوات الرقص الشرقي | حازم الشيخ | عالم المتزوجين | 0 | 08-05-2007 24- 09:18 |
