كيف البنت تتجنب الكلام غير اللائق على الماسنجر ؟؟

[مهندس زوجتي]

لازم البنت من أول ما تحصل او تسمع كلمة مب زينة من الشاب او واحد تكلمه على الماسنجر لازم ، لازم ترد علية بقوة وتوقفه عند حده على طول ، وبعدين تعملة بلوك أو تلغيه لأن الواحد يوم يقولكم كلمة ماصخة وما يحصل رد يأدبه ويهين كرامته او يوقفه عند حده (مثل ما قل أدبهة مع البنت اللي يكلمها)، يتمادا او يرجع يعيد الكلام او المواضيع المب زينة او الماصخة.

وعلى طول يتحول كلامه مع هذه البنت كلة كلام مثير او ماصخ وصعب انه يرد يتكلم معاها عدل او بحترمها مرة ثانية لأنه حصل تساهل في البداية من هذي البنت.

وقيسوا هذا الكلام على أشياء كثيرة مثلا لو واحد طالع مع وحدة ، أول شيء يعرض عليها الطلب غير لائق بطريقة خفيفة جداً او يقول كلمة بسيطة ، يريد منها ان يفتح الباب للكلام او لفعل اشياء مب زينة معاها، وهو بهذا التصرف او بهذا الكلام البسيط يريد يجس نبض البنت وردت فعلها ، واذا غضبت البنت عليه يتأسفلها كثير ويحاول يقنعها بأنة هذي مصخرة وزلت لسان, وبعدين يغير او يطلب منها تغير الموضوع ، واذا مشت معاه بالكلام بيزيد كلامة وطلباتة للأشياء المب زينة لين ما يوصل معاها للـي يبيه

وأحسن طريقة للرد على هذيله الشباب:

يوم يطلب منك طلب مب زين! قولي له ترضى على اختك تعمل هذا الشيء اللي انت تبغيه، أو ترضى ان أحد يقول لأختك هذا الكلام، وأْْي شيء يقولك اياه مب زين ، عيدي عليه نفس الكلام ، بس في بعض الشباب خبثا ويحاولون يردون ويقولون نعم ارضى ان اختي اتكلم واحد بس اذا كان مثلي (يعني يريد يضرب عصفورين بحجر اول شيء يسكت البنت ويرد عليها وثاني شيء يبين لها بان هو الشريف والصادق وما في مثله) فأنتي اذا رد عليك بهذا الرد قولي له بعرف اختك على اخوي او واحد اعرفه زين وولد مدين وممتاز واريد اعرفه على اختك موافق؟ هني بيتوهج او بـيـورط و يمكن يقولك انا شو يضمن لي ان يكون ولد زين مثلي قولي له ، وانا شو يضمنلي ان تكون زين وصادق ، وزيادة قولي له انااضمنلك انة هذا اللي بعرفة على اختك يكون زين مثلك ، واذا قالك بس انا كيف اعرف او شو يضمنلي انة يكون مثلي ، قولي له انا بعرفة على اختك وبخليها تكلمة واذا عجبها وشافتة زين تكمل وياه يعني مثلنا ، اغلب الرد او يمكن يقولك اختي الحين مشغولة في الدراسة وما تفكر بهذي المواضيع (مع انة هو يريدك انتي تفكرين بهذي المواضيع عشان يجرك ويخليك تستمرين معاه).


ومن الملاحظات على الكثير من البنات اللي عندهم علاقات حب مع شباب


ان البنت منهم تتكلم مع الشاب على التيلفون، وتطلع معاه، وأغلبهم يحصل بينهم شيء غلط ولو اقتنعت هذي البنت بأنه هذا الشخص اللي تحبه ما بيزوجها وجبـت لها الدلا ئـل والمؤشرات التي تدل على ان هذا الشخص صعب يزوجها , وحتى لو بينها وبين نفسها اقتنعت ان من الصعب انه بيزوجها ، تقول أنا ما اقدر اخلي هذا الشخص ، وتتحجج بأسباب تافهة او ضعيفة جدا مثلا : ان هذا الشخص أحبه وايد وما أقدر أخليه وهو مهتم فيني وينصحني عن اشياء غلط كنت اعملها , وانه غير فيها اشياء كثيرة مثلا يقول لها لا تحطين مكياج او يقول لها لا طلعين ولا شعرة من شعرك وتـغشي , ولا تروحين أماكن فيها شباب لوحدك ، فالبنت تسمع الكلام هذا من الشاب اللي متعرفة عليه, فـتـتخيل بأن هذا الشخص ينصحها ويهتم فيها وهذا الشخص يريدلها الخير ولو كان ما يريدلها الخير ما كان نصحها بهذي النصايح.

وهذا العمل او هذه النصيحة مدخل من مداخل الشيطان (لان من مداخل الشيطان انه يدخلك من مداخل الخير), يعني هو نصحها مثلا لا تحطين مكياج والبنت تهتم بهذه النصيحة وتفرح فيها ، بس ليش ما نصحها انه ما يكلمها على التلفون او ما تتـقابل معاه او يلمسها... الخ (ليش هذا مب حرام, مب عيب ليش ما نصحها وقال لها ان الكلام بينهم يعتبر حرام واحتمال كبير اذا أستمرينا نوقع بالحرام) وهذا الشيء محرم عليهم في دين الله , وفي عاداتنا وتقاليدنا أكبر عيب وأكبر عار يعني نلاحظه ان هو نصحها بالنصايحة اللي ما تخرب او تتعارض او تذكرههم بعلاقتهم المحرمة, وهو يعني حرم على غيره, وحلل الحرام لنفسه.

وفي اشياء لو مثلا البنت نصحوها اهلها انها تبتعد عن شئ غلط كانت تعملها ما تسمع كلامهم وتسمع كلام هذا الغريب (المحرم عليها) اللي حبته ( وهذي البنت تعرف او كانت تقدر تعرف الصح والغلط بالطرق المشروعة مثل القرآن والسنة والكتب والمحضرات الدينية).

والمتعرف على وحدة ينصح البنت عشان يخدعها فيما بعد ويذكرلها حتى احاديث او شيء من الشرع بس مب اللي يتعارض مع علاقته معـاهـا, مثلا لو كانت زعلانة او كانت ما تكلم اختها او بنت عمها او صديقتها ينصحها ويقولها ما يجوز المسلم يخاصم او ما يسلم على اخوه المسلم اكثر من ثلاث أيام ويذكرلها الحديث ، بس ليش ما يذكرها مثلا بالاحاديث الي تنهاهم عن هذي العلاقة المحرمة واللهي الأخطر .

قال صلى الله علية وسلم ((اياكم والدخول على النساء)) أي الاجنبيات عنكم

ليش ما يذكرلها مثلا فتوة مثلا سئل عنها الشيخ ابن جبرين السؤال التالي

ما الحكم فيما لو قام شاب غير متزوج وتكلم مع شابة غير متزوجة في التلفون؟

فأجاب لا يجوز التكلم مع المرأة الاجنبية بما يثير الشهوة، كمغازلة وتغنج، وخضوع في القول, وسواء أكان في التلفون أو غيره, ثم ذكر قوله تعالى { فلا تخضعن بالقول فيطمع الذي في قلبه مرض} صدق الله العظيم.

واحاديث وفتاوي كثير ما يقدر اللي متعرف على وحدة انه يقول لها. لان اذا قالها بيكشف حقيقة علاقتهم. وبتسبب لهم إحراج كبير

ملاحظة في نوع ثاني من البنات (**الة) تقدر تقردنهم او تتعرف عليهم عن طريق السب و التعليق عليهم ، انا شفت وسمعت كثير منهم يعني بتكون رزة ودفش معاهم يعني تتمصخر عليهم شوية تسبهم على الخفيف وبعدين هم بيمشون معاك في الكلام وبيرضون يتعرفون عليك...وما بطول في هذا الموضوع لانهم ما يستاهلون لانهم **الة ولو انهم بيكونون كلهم في الهوى سوى المحترمة وال**الة .. بعد ما يتعرفون

مقارنة تدل على سفالـة المتعرفين على بعض


أريدكم تقارنون معاية على دنائـة هذيل اللي متعرفين على بعض، مثلاً في وحدة متزوجة, ومع زوجها في السيارة هل هذيل يقدرون يسمعون قرآن او حديث او محاضرة دينية, اكيد يقدرون ووايد زين لأنة يوم الريال بيسمع وبـيعـود حرمته على مثل هذي الاشياء الطيبة, بيزيد إيمانها وبتتخلق باخلاق الإسلام زيادة، بس لو واحد ووحدة متعرفين على بعض في السيارة صعب على نفسهم انهم يسمعون قرآن لان القرآن او الحديث او المحاضرات، بتـنبهم بالغلط الي يعملونة (وهم يعتبرون بوضع نجاسة) و هم ما يريدون هذا الشيء، وما يريدون أي شيء يذكرهم بربهم, وأوامر ونواهي وحساب ربهم لكل الخلق, بس يريدون يسمعون آغاني مع بعض عشان تزيد وتـثير الغريزة بينهم زيادة ، وتذكرة وزيادة لكم اطلق العلماء على الاغاني اسم (بريد الزنا).

(القصة للتأكيد على نقطة معينة او لفتح موضوع)

مرة من المرات كنت مع صديقي في السيارة فاتصلت ربيعته على تليفونة , المهم وكنت مشغل القرآن في السيارة وبيعدين صديقي (غلق المسجل عشان كنت مشغل القرآن فأغلقة عشان يكلم ربيعتة) فرديت اشغل المسجل مرة ثانية ورد اغلق المسجل ، المهم خلص المكالمة مع ربيعتة وقلتلة ليش سكرت القرآن قالي مب زين تبغي تنزل من مستوى القرآن (والله انة قال هذا القول وانة هذا اللي حصل) (شوفو كيف يعني هو اعترف ان علاقتهم مع بعض بالسانه ولو كان مب قاصد هذا الشيء على انه علاقتهم سيئة ومستوها سافل ، فكيف هذي البنت اللي متعرف عليها وعندها أمل في الزواج منه تفكر ان علاقة بهذي المستوى السافل انة بتنتهي بزواج(مع انة كلامهم ما في شيء مب زين) ، وهل تتوقع من هذا الشخص بيرفع مستوها او بيقدرها وبيخلها بمستوى اللي يطمح إليه كل شاب بان تكون له زوجة العفيفة ومحتشمة وما عندها هذي السوالف ، تعارف طلعات مواعد تلفونات ..الخ


البنت يوم بتتعرف على شاب بتحصل مجاملات كثير من التعارف


وطبعاً البنت يوم بتتعرف على واحد بتحصل مجاملات كثيرة من التعارف، مثل الهدايا في أعياد المسيح يعني في عيد الحب ، ومجاملات كـثـيـرة في اشياء كثيرة ، يعني في الكثير من الشباب يعترفون قدام بعضهم ويعترفون بلسانهم ويقولون انة لازم الواحد اول شيء يذل عمره وحتى يبوس رجلها ، ويحاول معاها بكل الطرق يعني يبني معها علاقة حب قوية ، ويجيـبلها هدايا ويقولها احسن الكلام ويبني الثقة بينهم ، بس عشان آخر شيء او في النهاية يوصل للي يبيه منها يعمل معها أشياء مب زينة او اللي يبغية بس قبل الزواج (يعني بدون زواج)، فلا تـغـتـر البنت من كثرة الاهتمام فيها ، وتقول مسكين وايد او كثيـر متعب عمرة عشاني ، وعشان هذا تـتـنازل عن شيء من خصوصيتها وتقول لازم أرد جميلة عليه ، او اراضيه وتعمل أي شيء هو يطلبه ويلمح لها عليه دوم مثل انها تعطية صورتها او تطلع وياه وتقول بس شوية عن خاطره ، او عن خاطري وخاطره انهم يعملون شيء مب زين


ومن آداب بنات الناس ، ما تذكر اسم عائلتها او اسمها لأن


ومن آداب الانترنت انة الوحدة ما تذكر اسم عايلتها او اسمها لان البنت يوم تكتب اسمها وبعدين اسم عايلتها يمكن تشوه صورة او سمعة عايلتها ويقولون شوفو بنت فلان او اخت فلان او من اهل فلان حصلت اسمها على الرسايل .. الخ حتى لو كانت رسايل عادية او دينية ، أغلب الشباب يترجمونها غلط ويمكن يستغلونها غلط فالواحد ما يفكر شو هذي الرسالة بس يشوف اسم وحدة واسم عايلتها ياخذ فكرة غلط او مب زينة عنها وعن عايلتها، يعني مثلا في بعض الاشياء معروف انه كل الناس او البنات يعملونها بس العيب انها تنعرف او يعرفون انة بنت فلان بالتحديد انها عملتها ( ابغي افهمك اللي في راسي وما اضني جدرت اعبر عدل او اوصللكم الفكرة فاسموحولي) يعني البنت اذا ذكرت اسمها او اسم عايلتها مب زين والله خاصة على الشات او الماسنجر او اي طريقة غير مشروعة من تعارف واختلاط .

يعني هل تتخيلين انك يوم تكتبين مثلا اسمك واسم عايلتك في الشات الناس وخاصتنا الشباب بيحترمونك زيادة والله بالعكس ، يعني تخيلي انك كنتي ولد وكلمتي بنتيتن في الشات ووحدة حاولتي تعرفين او تجرين منها أي معلومات خاصة مثلا اسمها وبعد كل المحاولات ما قدرتي شو بيتكون في نفسك أول شيء خيبة (ويهك بيحترق) وفي نفس الوقت احترام لها لان حتى اسمها مب راضية تقوله ، وتريد تستر حتى على اسمها ، والبنت الثانية مرة جاهزة تستعرض في الشات (اوصخ مكان) انا بنت فلان الفلاني ، والله فرج بين الاولى والثانية


يمكن البنت تتزوج عن طريق شغلها مثلا في مؤسسة او وضيفة حكومية بس طبعا لازم تكون بشروط

وشوفوا يمكن الوحدة تتزوج عن طريق شغلها مثلا في مؤسسة او أي وظيفة حكومية، بس طبعا لازم تكون بشروط باذكرها لكم باللي بيخطر في بالي الحين: اولا لازم تكون محترمة يعني ماتتكلم او تسولف مع الريايل او الموظفين إلا بمجال وبخصوص العمل بس ، وللاسف نشوف مرات الوحدة منهم تضحك مع الموظفين وتسولف معاه كأنها وحدة من صديقاتها ، المهم ولو الواحد يبغي يزوج وحدة من زميلاته بالعمل لازم يطلب ايدك من اهلك على طول وبدون لف ودوران مثلا يعني يقولك ابغي اتكلم معاك او اقابلك عشان نعرف بعض اكثر ( ليش كل هذا اذا هو طلب منك هذي الطلبات شو الفرق بينك وبين البنات الي تنازلوا عن خصوصياتهم على امل بالزواج بهذي الطريقة ).


ملطوش بدون رخصة[/align]

[مايا2]

والله كل كلامك صح و يسلمووو كتير على مو ضعك جميل جدا ولازم كل بنت تعمل هيك

[السيف المهند]

الموضوع رائع

لكن ياحبذا لو كان عنوانه نصح فتاه من اضافه شاب بالماسنجر او التلفون او نحوه ...

ايضا احب ان انصح الفتيات

بان ينتبهن من كل مايخدش الحيااء..

ياخي الكريم

حقيقه

الموضوع متشعب

واقول

لكل فتاه مشت بهذا الطريق

حان لك العوده

هيا للتوبة النصوح ومسح الماضي والندم على مافات والاستغفار من الذنب..

هيا للخير ودعي الشر..

اخواتي

ان هذه لعبه بالاعراض رخيصه جدا لذا احذرن من الانسياق وراء مسميات الصداقه و الحب وغيرهاا..

فكلها تلعب بقلوبكم حتى تتمكن من شرفكم ..

العفه والطهاره اجمل ما يزين الفتاه فهل تبيعها ؟؟؟الفتاه !!!!!!!!!!!!

موضوع قيم

يعطيك العاافيه و شكرا لك ..

[حلم القلوب]

جزاك الله خير
وبارك الله فيك
موضوع مفيد جدا