السلام عليكم ورحمة الله وبركاته
الحقيقة مافيه الاسلامتكم هذي سالفة قديمة سمعتهاقبل كم سنة غريبة وعجيبة وتخوف خاصة للي يسمعها بالليل مثلي كناجالسين في البروالجو بارد والنار مشبوبة ومطفين النور ونشرب حليب وكان الوقت متأخروكانت السواليف عن الشجاعة وعدم الخوف وكان الناس يتراهنون من اللي مايخاف اذا كان بلحاله المهم كان معنا شايب وعطاناهالسالفة ويقول انها حقيقية والقصة قديمة يقول : كان فيه شباب جالسين بالليل يتعللون وكل واحد منهم يقول انااشجع منكم وتراني مااخاف طال الكلام بينهم وقال واحد منهم وش رايكم نتراهن ونشوف لنا مكان يخوف واللي يروح لمه بالليل نعطيه خروفين بس لازم نعطيه شئ يحطه هناك علشان بعدين نروح وانتأكد انه فعلا راح بعدين قال واحد هاه من يروح يالربع كلهم سكتوا بعد شوي قال واحد منهم انا اروح وش المطلوب مني قالوا له نبغاك تروح للقصر اللي يبعد عن الديرة عشرين كيلو وكلهم يعرفون هالقصر والقصر هذا من طين كبير وغرفه واجد ويخوف بالنهار لانه اظلم مرة ولا حوله احد وقالوا له خذ هالوتد واذا جيت الغرفة الفلانية_ واختاروا له ابعد غرفة في القصر واوحش غرفة _ طق الوتد في زاوية الغرفة وشرطوا عليه انه يروح بالليل وقلوا له ترانا نبي نراقبك واذا جابالنهار نروح نتأكد من الوتد وهم يعرفون الوتد اللي عطوه زين وعطوه الوقت اللي يروح فيه للقصر علشان اذا وصل القصر يكون وصله بالليل المهم وافق الرجال وتوكل على الله ومشى بلحاله ولا معه اي شئ يدافع فيه عن نفسه ولما جاء بعد العشاء وصل للقصر وهو يمشي على رجليه كان الوقت برد ومطر سمى باسم الله ودخل ولما مشى له كم خطوه بدا يسمع صوت خافت مرة قعد شوي يتسمع فظن انه يتوهم واستمر بالمشي للغرفة المتفق عليها صار الصوت كل ماله يقرب ويرتفع والصوت يروع صوت ونين مع صياح استمر الرجال نحو الغرفة والصوت مستمر الين وصل باب الغرفة صار الصوت المخيف يطلع من الغرفة قعد يسمي ويقول فيه احد انت انس والا جن طبعا الغرفة ظلام مرة وخاصة للي داخل للغرفة اما اللي بالغرفة يشوف احسن شوي يوم اخذشوي تشجع ودخل اكثر لما تقدم جاه رجمة بشي ضربه مع رجله يوم لمسه لقاه يد آدمي سمى بالله ودخل زيادة جاه رجمة وهالمرة صارت يد يوم قرب اكثر جاه رأس آدمي كبير وقف شوي والصوت موجود لاكن ماجاها رجمة يوم انه بدا يشوف شوي شاف سواد مجمع في زاوية الغرفة قرب لمه وتلمسه لقاها حرمة تون بحزن وكل يدينها تقاطر دم سمى عليها وشالها وطلعها للسفروشب لها نار ودفاها وجلس عندها الين الصباح شوي شوي الين عرفها وش صارت السالفة صارت الحرمة هذي زوجة اميرديرتهم ارسلها الامير على شان تزور اهلها في الديرة الثانية تبعد عن ديرة الامير يجي خمسين كيلو وكان معها عيالها ثلاثة صغار ومعهم العبد حقهم موصيه الامير يوديهم وينتبه لهم وهم رايحين على بعارين لعلهم وهم يمشون بهالبرد والمطر صار اقرب شئ لهم قصر الطين القديم اللي جاي لمه الرجال اللي مراهنينه اخوياه قال العبد لعمته خلينا ندخل بالقصر عن البرد والمطر واذا زان الجو نمشي وافقت على شان عيالها ودخلوا القصر وكان الوقت آخر النهار عاد يقولون ان العبد هذا متربي عند الامير من يوم انه صغير والامير واثق فيه مره ومن الصدف ان العبد اختار الغرفة الاخيرة لانها ادفىمن غيرها اللي صار ان العبد يوم ريح وتلين وحس بالدفأ لعب عليه الشيطان وهم بعمته وقعد يحاول فيها زعلت الحرمه وسبته وطردته عنها غضب العبد وصمم على فعل الفاحشة ويوم شافها عيت عليه مره هددها ومسك واحد من عيالها وقال اذا ماوافقتي تراي ابذبحه قالت اذبحة قام العبد وذبحه وهي تشوف وجاب الثاني وهددها فيه وعيت واذبحه وجاب الثالث وعيت وذبحه ضحت بعيالها علشان تصون عرضها وشرفها بعدين هجم عليها بالقوة ومن تسهيل رب العالمين لما تماسكت هي وياه طاحت يدها على السكين اللي كانت معه على طول شقت بطنه ومات العبد ما حصل شئ وهي من القهر ومن الصدمة القوية صارت تقطع العبد الرجلين بالحال واليدين والرأس وجلست بهالغرفة الين ارسل الله لها هالرجال اللي مراهنينه اخوياه لما عرف الرجال القصة مسك رأس العبد وطق الوتد فيه ولزقه بالربعة المتفق عليها واخذ الحرمة وداها للامير واشتهر عند الناس وهو يستاهل وراحوا اخوياه وتأكدوا من صحة كلامه واعطوه الخروفين واكرمه الامير وخلاه من خوياه المقربين 000تمت وصلى الله وسلم على نبينا محمد 0
ارجو احبابي اني ما اكون خوفتكم تحياتي للجميع تميــــــــــــــــــــــم
20-11-2005, 24- 00:52
ســـــــــــــــــــــــــــــالفة عجيــــــــــــــــــــبة00
