في أول يوم عيد الفطر عايدني زوجي وهو مستانس عالآخر والفرحة مش سايعاه ( أكيد خاش لي خبر حلو )
وفي الضحى عايد أهله وأهلي جان يقول لي يمكن باكر نسافر آنا وفلان قلت له على وين قال لي على
مصر والأردن لمدة أسبوع عشان فلان يبي يقدم رسالة الماجستير بالحقوق من الثلاثاء إلى الثلاثاء ماراح
نطول ،، ومو أكيد احتمال ما نحصل حجز ( وهم حاجزين من نص رمضان ) المهم يوم صار ثاني يوم العيد
المفروض احنا كلنا نزور أهلي على الغداء أهو ما كان من الموجودين على الغداء ( حضرته كان نايم )
ولما صار بالليل اتصل علي وقال أبي الجنطة الكبيرة الصغيرة ما تكفي ( شكلها السفرية مطولة )
وسافر يو الثلاثاء بالليل سافروا ، ويوم الأربعاء اتصل يسأل عنا وسألته وينكم قال في مصر وسألته
وين سكنتوا بفندق ولا بشقة عمي ( أبوه ) قال بشقتنا ,,, ( حلو الصيدة سهلة ) ويوم الخميس العصر
اتصلت أخته علي تسأل جان تقول لي أبوكم اشعنده مسافر سوريا قلت لها اشدراج قالت أهو قايل حق أمي
يبي يروح سوريا ( للعلم مفتاح الشق عند عمي ) ،،، المهم لما سكرت التلفون منها اتصلت أهو بالليل قلت
له وينكم قال لي بالشقة قلت له ييب لي طقم جوتي وجنطة من المجمع المجاور للشقة حق الشتاء ( عشان أصيده )
قال لي حاضر ،،، ومن يوم الأربعاء لليوم ما سمعت صوته يمكن شك إني طحت عليه والله أعلم لا اتصل علي
ولا على أهله والكل منا كان يحاتي هالسفرة ....................
والحين آنا شاكة إن هذي السفرة على لندن تدرون ليش لأن المكالمات اللي كلمني منها كان الرقم الدولي
يبدأ بصفر وبس بدون أي أرقام ثانية مجرد رقم واحد ( 0 ) وبعدين أخو صاحبه يدرس بلندن ........
أهله شافوني جادة راحوا سألوا أهل صاحبه ( جيرانهم ) وقالوا إنهم راح يوصلون باكر الجمعة ،،،،،،،
الحين آنا أبي أعرف اشلون أواجهه ،، لاتقولون لي لا تكلمينه وطنشيه وسوي روحج ما تدرين
مستحيل آ نا مو طوفة هبيطه عنده ، لأني إذا سكت عنه راح يسويها مرة ثانية فيني خلال شهور
ريلي وآنا أدرى فيه ،،، أبيكم تقولون لي كلام يكسر شوكته عشان يحس بغلطته معاي ومايكرر هالسالفة
مرة ثانية ،،، لأني فعلاً مليت من هالطبع الخايس وشكلي راح أكبر السالفة وماراح أخليها تعدي على
خير ،،، فأرجوكم ساعدوني ........
أختكم في الله الشهد كله .
مشكلتي عجيبة غريبة
